KAAPSTAD. – Die liefde blom nie meer op die verhoog óf in die werklike lewe tussen die sanger en liedjieskrywer André Swiegers (48) en die bloedjong Monica Burger (21) nie.

“Ek glo as jy werklik lief is vir iemand kan jy nie net ’n deur toemaak en daarvan vergeet nie, anders was jy nooit regtig lief vir daardie persoon nie. Ek moet erken ek het baie seer oor Monna, ek kan nie myself mislei nie. Die beste verhouding wat ek ooit met ’n vrou in my lewe gedeel het, was met haar,” sê André hieroor.

Hy en sy seun, Emile (15), sal voortaan ’n dodelike pa-en-seun-kombinasie op die verhoog wees.

Die lewe het André die laaste ruk ’n hele paar taai klappe toegedien: sy bloeddruk-probleme, die kolonkanker wat by sy broer gediagnoseer is en dan die verbrokkeling van sy twee jaar lange verhouding met Monica.

André is egter optimisities oor die toekoms.

“My lewe gaan aan en ek kyk vorentoe. Gelukkig is my bloeddruk weer onder beheer danksy medikasie. Ek voel goed onder omstandighede.

“Ek skryf liedjies vir ’n volgende album en doen heelwat optredes. Ek dink nie ek sal gou weer ’n vaste verhouding oorweeg nie.”

André en Monica se verhouding het skeefgeloop nadat Monica vir mnr. Renier Müller, ’n ortopediese verteenwoordiger, ontmoet het.

“Monica en Renier se sakeverhouding het vinnig in ’n liefdesverhouding ontwikkel,” het André ge­sê. Hy erken egter sy aandeel in die mislukte verhouding.

“Ek besef wel nou ek het nie die nodige aandag, tyd en liefde aan Monica en my kinders gedurende die laaste paar maande gegee nie – al is daar redes om dit te probeer regverdig. Dit het my gekos.”

Volgens Monica het die verhouding stadig gesterf en het die paar­tjie uit mekaar beweeg.

Emile en André is vuur en vlam vir hul gesamentlike loopbaan.

“Ek het vir my kinders gesê ek kan nie die familiekonsert-ding doen nie, maar as hulle soos pro’s kan speel, is hulle welkom om saam met my die musiekrondes te doen. Van toe af het my huis gedreun soos daar geoefen is!”

Emile bewonder sy pa wat só baie bereik het sonder enige teoretiese agtergrond, en glo André se musiek tel onder die beste in Afrikaans.

André en Emile onderneem dié maand ’n Wes-Kaapse toer. Hulle is op 18 Desember op Lambertsbaai, die 19de by Club Mykonos, die 21ste en 22ste by die Dorpstraat-teater in Stellenbosch, die 26ste by die Kunskafee in Durbanville en die 28ste op Stilbaai.