Gerrit Badenhorst is Suid-Afrika se wêreldkampioen-kragman met ‘n hart. Hy het sy jare lange droom om ‘n musiekloopbaan te integreer met sy kragman-tentoonstellings verwesenlik met die uitreiking van sy album, Soen, Soen, in 2005. Met die bekendstelling van sy musiekloopbaan is hy die eerste kragman, wat ook sy sangtalent in ‘n vertoning wys. Die kombinasie van kragmantoertjies en sang skep prettige, eiesoortige vermaak vir optredes by ‘n wye verskeidenheid geleenthede.

 

As kragman is hy reeds jare lank wêreldbekend, en diè bekendheid het hom ook die geleentheid gegee om reeds in Nederland en Hongarye as sanger by kragman-geleenthede op te tree.

 

 

 

 

 

Gerrit weeg tans 120 kg. Op nasionale vlak het hy Suid-Afrika verteenwoordig in Gewigopotel en Kragoptel.  Hy was 3 x Wêreldkampioen in Kragoptel en het hoër prestasies as enige ander Suid-Afrikaner behaal deur wêreldrekords van 450kg hurksit (squat),  402,5kg dooiegewig (deadlift) te oortref.  Sy persoonlike beste bench press is 255 kg.  Hy het vir 9 agtereenvolgende Wêreld Sterkman-kompetisies (‘n wêreldrekord tot nou toe) gekwalifiseer.

 

Gerrit was 10 jaar lank onder die top 5 op die Wêreldranglys met ‘n beste plek van 2de posisie in die amptelike Wêreld sterkmankompetisie in die Bahamas.  Hy het die World Mighty man-titel en die Hollandse Grand Prix-titel teen die beste Wêreld-sterkmanne gewen. Hy het onder meer in Amerika, Malta, The Isle of White, Engeland, Skotland, Finland, Ysland, China, Holand, Hongarye, Frankryk, Italië, Luthihania, Turkye, Marokko, Kanada en Mauritius as sterkman opgetree.

 

Gerrit het in Mei 2002 uitgetree as kompeterende sterkman en het hom gevestig as sterkman-vermaaklikheidskunstenaar. Gerrit organiseer en bied ook amptelike sterkmankompetisies aan en is die president van die SA Sterkman-unie. Hy het die Staatspresident en Sportskrywer se Sportman van die Jaar-toekennings twee keer ontvang.  Gerrit word ook vereer in die Nasionale Museum in Bloemfontein met ‘n uitstalling van die Wêreldrekord- rotsblok van 145 kg, wat hy in 1998 bo sy kop uitgestoot het. 

 

Tipe optredes, wat hy tans as Sterkman bied:

 

Hy doen al baie jare landswyd vemaaklike sterkmanvertonings en betrek die pa’s, ma’s en kinders.  Sy vertoning sluit items, soos die volgende in:

 

· Stoot ‘n apparaat, soos ‘n kruiwa, met byna 20 kinders daarop
· Tot byna 40 kinders probeer beide sy arms met 2 toue ooptrek
· Trek ‘n bus, trok of swaarvoertuig tot 10 ton met sy bene
· Bied die sterkseuntjie-, sterkpa- en sterkvroukompetisie aan
· Lig ou Skotse, ronde klippe en -sakke op staanders
· Praat oor sy lewenswyse, lewensuitkyk, diëte en motivering
· Tree op as aanbieder van nasionale en internasionale sterkmankompetisies

 

Gerrit, die Sanger

 

Hy het sy jare lange droom om ‘n musiekloopbaan te integreer met sy kragman-tentoonstellings verwesenlik met die uitreiking van sy album, Soen, Soen, in 2005.  Met die bekendstelling van sy musiekloopbaan by die Klein Karoo Nasionale Kunstefees in 2005 is hy die eerste kragman, wat ook sy sangtalent in ‘n vertoning wys. Die kombinasie van kragmantoertjies en sang skep prettige, eiesoortige vermaak vir optredes by ‘n wye verskeidenheid geleenthede.

 

Gerrit sing veral liefdesliedere, wat spesiaal vir hom geskryf is. Sy motto op die verhoog, is: “Ek dra jou op die hande”. Diè motto sê presies wat Gerrit Badenhorst in hart en siel is: ‘n sterk man, wat sy gehoor fisies op die hande kan dra vir ‘n oomblik se pret, maar ook met sy stem sy gehoor op die hande dra. (In ‘n gedeelte van sy verhoogprogram dra hy ‘n vrou uit die gehoor op die verhoog en sing vir haar ‘n liedjie.)
Gerrit se aanhangers noem hom ook “Die wêreld se sterkste sanger”.

 

Gerrit het as sanger reeds die verhoog gedeel met onder meer Kurt Darren, Danie Niehauws, Jannie Moolman en Eden. Hy was ook deel van die Rugby Klink Goed-span wat onlangs in die Vrystaatse rugbystadion teen die Vrystaatse veteranespan gespeel het. Gerrit is in genooi om die sterkman-temalied, wat spesiaal vir hom geskryf is, in Nederland en Hongarye te gaan sing tydens internasionale sterkman-kompetisies.

 

Die album, Soen, Soen, bevat sewe nuwe, oorspronklik liedjies.  Die tempo en klanke van die res van die bestaande liedjies is nuut verwerk . Die opname van byna al die liedjies se musiek bestaan uit lewendige instrumentasie, wat n warm, oorspronklike en lewendige gevoel aan die album gee. Die liedjies is geskryf deur verskeie skrywers, het tempo, mooi woorde wat wissel van dans en rock, tot rustige balades met klavierbegeleiding. Die album bestaan meestal uit Afrikaanse liedjies, en het drie Engelse snitte.